د شریعت اووه فولادي سپرونه؛ د استکبار د مزدوران پر وړاندې یو نه ماتېدونکی دیوال
به قلم: ابوهاجر خان آبادی
یو ځل او د تل لپاره، پرېږدئ چې نړۍ او د تاریخ تښتېدلي پوه شي چې د ایمان جغرافیا په وینو او تدبیر ساتل کېږي. د افغانستان اسلامي امارت دارالاسلام نن یوه بې دفاع خاوره نه ده، بلکې د اوو دفاعي او امنیتي طبقو یو محکم کلا ده چې ترې تېرېدل یو محال خیال دی.
زموږ دفاعي نظام پر دریو فولادي ستنو ولاړ دی چې هره یوه یې په روزل شویو او ځانګړو قطعو (Special Forces) سمبال ده:
۱. د ملي دفاع وزارت اتل اردو: د سرحدونو او ځمکنۍ بشپړتیا ساتونکي چې د طمعکارانو په سترګو کې یې خوب حرام کړی دی.
۲. د استخباراتو د لوی ریاست بیداره ځواکونه: د نظام هغه بیداره سترګې چې د دښمن پټې دسیسې په نطفه کې خنثی کوي.
۳. د کورنیو چارو وزارت زړور مجاهدین: د عامه نظم او امنیت ضامن چې هیبت یې د مفسدینو په اندامونو لړزه راولي.
دا ۶ دفاعي لایې (۳ وزارتونه او ۳ خاصې قطعې)، یوازې د جګړې لومړنۍ کرښې دي. که بالفرض څوک وکولای شي له دې سدونو تېر شي، نو له وروستي کابوس سره به مخ شي:
«د البدر ځانګړې او خاصه قطعه»؛ هغه پوځ چې مستقیم د عالیقدر امیرالمؤمنین (حفظه الله) تر قوماندې لاندې دی، په پرمختللو تجهیزاتو سمبال او سر په لاس، د هر تېري کوونکي ځپلو ته چمتو دی.
ای هغو کسانو چې ۲۰ کاله مو د ناټو او امریکا تر بیرغ لاندې خپل ملت ته شا کړه! تاسو چې نن د پردیو په غېږ کې پناه اخیستې، پوه شئ چې تاریخ به تاسو د «حلقه په غوږ غلامانو» په نوم یاد کړي.
ایا نه یاست خبر چې الله تعالی فرمایي:
وَلِلَّهِ الْعِزةُ وَلِرَسُولِهِ وَلِلْمُؤْمِنِینَ وَلَكِنَّ الْمُنَافِقِینَ لَا یَعْلَمُونَ. عزت یوازې د الله، د هغه د رسول او مؤمنانو لپاره دی؛ خو منافقان پرې نه پوهېږي (منافقون/ ۸)
الَّذِینَ یَتَّخِذُونَ الْكَافِرِینَ أَوْلِیَاءَ مِنْ دُونِ الْمُؤْمِنِینَ ۚ أَیَبْتَغُونَ عِنْدَهُمُ الْعِزَّةَ فَإِنَّ الْعِزَّةَ لِلَّهِ جَمِیعًا (النساء/ ۱۳۹)
هغه کسان چې د مؤمنانو پر ځای کافران خپل دوستان نیسي؛ ایا عزت د هغوی سره لټوي؟ په حقیقت کې ټول عزت یوازې د الله لپاره دی.
چېرته دي هغه کسان چې د رهبرۍ دعوه یې کوله؟
• احمد مسعود، محقق، سیاف، دوستم او خلیلي! تاسو چې یو عمر مو په درواغجنو شعارونو د دې خاورې ځوانان ووژل او خپله د دوبۍ، ترکیې او اروپا په ویلاګانو کې پناه واخیسته.
• تاسو چې د اشغالګرو سره لاس په لاس، “ارربکي” خاینان مو د خلکو په سر او مال مسلط کړل او پایله یې د مسلمان ملت لپاره له بېوزلۍ، کډوالۍ او ورانۍ پرته بل څه نه وه.
• تاسو چې شل کاله د امریکايي بادارانو لپاره دمتکاني ته «ډیموکراسي» وویل، اوس د اسلامي امارت د هغه عظمت په وړاندې چې د نړۍ زبرځواک یې په ګونډو کړ، څه ویل لرئ؟
هغه خیالي اردو چې تاسو پرې نازېدل، د حق د لارې د مجاهدینو د ایمان په وړاندې پودر شوه. نن افغانستان د داسې یو پوځ خاوند دی چې د ډالرو او لوېدیځو ویزو لپاره نه، بلکې د اعلاء کلمةالله لپاره جنګېږي.
د رحمت د پېغمبر (ص) په فرموده: «لَا یُلدَغُ المُؤمِنُ مِن جُحرٍ واحِدٍ مَرَّتَینِ» (مؤمن له یوه سوري څخه دوه ځله نه چیچل کېږي). د افغانستان ملت به نور ستاسو د تکراري او پلورل شویو څېرو په دوکو کې رانشي. د افغانستان ځمکه به د خاینانو لپاره له دوزخ څخه هم زیاته توده وي.
نصرت زموږ دی، ځکه چې موږ له الله سره تړون کړی دی.
وَمَا النَّصْرُ إِلَّا مِنْ عِنْدِ اللَّهِ الْعَزِیزِ الْحَكِیمِ.
