د اسلام او مسلمانانو خاینان؛ د دارالکفر په غیږ کې د سیکولر باغيانو رسوايي
به قلم: ابوهاجر خان آبادی
نن سبا «د افغانستان اسلامي امارت» په سیمه کې د یوازیني ریښتیني «دارالاسلام» په توګه د شریعت سپیڅلی بیرغ پورته کړی دی. په مقابل کې یې، یو شمېر سیکولر باغیان او مرتدین چې کلونه کلونه یې د امریکايي اشغالګرو مزدوري کوله، اوس د «ازادي جبهې» او نورو درواغجنو نومونو لاندې د اسلامي نظام پر ضد خروج کړی دی. دوی مجاهدین نه، بلکې «باغیان» او د اسلامي امت د ارمانونو خاینان دي.
مستندې موندنې (د هندوکش غږ د رپوټونو په ګډون) د یوې لویې رسوایۍ پرده پورته کوي. دا اوباش چې د ازادۍ چیغې وهي، په حقیقت کې د امریکا سیمه ییز مزدوران او د پاکستان د مرتد او سیکولر نظام تر واک لاندې د «چترال» په غرونو کې پټ دي. دوی چې په خپله خاوره کې ځای نه لري، د «پاکستان په دارالکفر» کې یې پناه اخیستې ترڅو د اسلامي امارت پر ضد د امریکا په ګټه تبلیغاتي جګړه پرمخ یوسي.
دا سیکولر باغیان د اسلامي امارت له غښتلو سرتیرو سره د مخامخ کېدو توان نه لري، ځکه نو «رواني جګړې» او «سینمايي درواغونو» ته یې مخه کړې ده:
• د جغرافیا جعل: دوی د چترال او د افغانستان د بدخشان او لغمان ولایتونو د غرونو له ورته والي ناوړه ګټه اخلي او هلته ویډیوګانې جوړوي او په درواغو ادعا کوي چې ګنې د افغانستان په خاوره کې دي.
• مسخره نمایشونه: نامعلومو لورو ته د راکټونو ډزې، پرته له دې چې د مقابل لوري غبرګون یا جګړه وي، دا ښیي چې دا ویډیوګانې یوازې د امریکايي او پاکستاني بادارانو د خوشالولو او د ډالرو د ترلاسه کولو لپاره جوړې شوې دي.
په تیرو اونیو کې د فتنې پر مرکزونو د اسلامي امارت د هوايي ځواکونو بریدونو ثابته کړه چې د پاکستان مرتد رژیم څنګه خپل ټول امکانات او پناه ځایونه د داعش او باغیانو په واک کې ورکړي دي. دا شومه مثلث (امریکا، د پاکستان رژیم او داخلي مزدوران) غواړي اسلامي مرکزي حاکمیت کمزوری وښيي، خو دوی ناخبره دي چې الهي نصرت له هغو کسانو سره دی چې د دارالاسلام د هرې لویشتې خاورې ساتنه کوي.
د امام ابوحنیفه رحمه الله او د سلفو علماوو د فقهي نظرونو پر بنسټ، د هغه عادل حاکم او نظام پر وړاندې «بغاوت» چې شریعت یې پلی کړی وي، لویه ګناه ده. دا کسان چې نن د پاکستان په غرونو کې درواغجنې نارې وهي، هماغه کسان دي چې پرون یې د امریکا د B-52 الوتکو تر سیوري لاندې پر خپل مسلمان ولس ظلم کاوه. د افغانستان مسلمان ملت ویښ دی او پوهېږي چې دا نمایشي حرکتونه یوازې د سیکولرېزم او بې دینۍ د بیا راوستلو یوه ناکامه هڅه ده.